cy blog: [FACE.直接睇]港女人辦迫婚失敗紗廠闊少狼撇周麗淇

[FACE.直接睇]港女人辦　迫婚失敗　紗廠闊少狼撇周麗淇

封面

跟鄭嘉穎分手後，32歲周麗淇（Niki）09年暗交紗廠太子爺Eric，原本下年升呢入門做卓太，但因卓家老爺同奶奶唔多喜歡娛圈女星，令心急入門的Niki推走唔少job，洗底博卓家歡心。據知Niki早前去巴黎睇時裝騷時，更周圍睇婚紗，返到香港又一廂情願向朋友宣布喜訊，結果埋門一腳迫婚失敗，出名港女格難服侍的Niki嚇走紗廠闊少。

冇咗支大水喉，Niki上年又跟bma滿約，惟有急急「復出」四圍撈，更找梅艷芳生前經理人Marianne（王敏慧）做經理人，週一Marianne對本刊說：「佢家單身！」

對終身大事一向上進的Niki，加上家姐周汶錡穿針引線之下，認識姓卓的紗廠太子爺Eric，雖然卓家非常壜水，大宅位於西貢碧濤花園價值3千萬獨立屋，但卓家一向低調，所以兩老一直反對Niki入門。據知情者透露︰「Eric父母覺得娛樂圈複雜，佢哋拍拖咁耐，Niki都冇去過男友西貢屋企，反而Eric就經常去Niki租住嘅曼克頓山，但最近佢哋分咗手，Niki亦都搬咗去貝沙灣。」

臨嫁炒大鑊

今年中，已傳出Niki同Eric有計劃結婚，32歲Niki仲同幾位密友報喜訊，不過，原來只係Niki一廂情願。知情者續說︰「講咗幾個月㗎喇，Niki之前好多job搵佢做，佢都只係接廣告，電影就更加唔拍。後來佢哋鬧咗場大交。Niki九月仲去巴黎睇騷，順便睇吓婚紗，點知返到香港就話分咗手。」

超級筍盤

Eric父親卓仕章為金徽毛紗貿易有限公司老闆，1986年創業，於東莞有幢三層毛紗廠，香港辦公室於葵湧。而卓父及卓母亦持有現市值3千萬的西貢碧濤花園大宅及兩項分別位於長沙灣及葵湧的地鋪以及工廈物業，合共約市值四千萬。絕對稱得上是筍盤。

住近家姐

於Niki持有的公司K.O. International Ltd.的商業登記一欄內住址，已由「曼克頓山」改為「貝沙灣」，住近同樣住貝沙灣的家姐周汶錡。

現實大出入

本週二（6日）首播的新劇《我的如意狼君》，講述黃浩然自小被趕出家門，長大後為報仇以假身份回家，重遇兒時好友Niki，更不惜利用多年友誼騙取純女Niki的金錢和感情。Niki戲中楚楚可憐又唔貪入豪門，愛情飲水飽角色與Niki現實好大分別喎！

寡佬打邊爐

據知，Niki跟Eric拍拖近3年來都得不到卓家老爺和奶奶歡心，雖然Eric口口聲聲話會娶Niki，但卓家兩老卻極力阻止。知情者說︰「Eric開始承接家族生意，又點會咁快想俾人箍住？」本刊最近亦發現Eric似乎修心養性，冇日日匿埋屋企打XBox，反而日日為工事頻撲，唯一娛樂都只係跟三五知己打邊爐，飯局後乖乖返回西貢碧濤花園卓家大宅。

死要做主角

叠埋心水諗住嫁嘅Niki，希望收山之前拍部代表作，原本《東西宮略》8月開拍前屬意由她做夏迎春一角，但Niki竟要求做主角鍾無艷，明搶陳法拉飯碗。雖然監製極力遊說，但Niki都企硬唔做阿二，監製惟有搵陳敏之執二攤。對於Niki曾有機會參演，監製黄偉聲對本刊承認︰「有聽聞，不過當時我放緊假，放假返嚟已經解決咗！」正式嫁人無望，Niki惟有「復出」撈，乜都肯做。最近她就接了新劇《女警愛作戰》，更搵老死Marianne王敏慧（梅艷芳生前經理人）做經理人，主要接國內工作。據知，Niki更簽了唱片公司全面復出。上週本《女》劇活動上問Niki是否簽了新唱片公司，Niki笑笑口︰「未講得邊間，總之就唔係5大（唱片公司）。」記者再問Niki，最近多位女星排隊嫁人，幾時輪到佢？點得Niki反應極大：「唔好成日問我呢啲嘢啦！」而Marianne週一對本刊強調Niki嚟緊工作不斷，但對於同Eric分手，她就話：「我唔知佢有男朋友喎，佢家係單身！」32歲Niki復牌上市，唔算遲嘅！

撈食自己

《女警愛作戰》新劇開鏡拜神，梅艷芳生前的經理人Marianne（左一）忽然現身，原來做咗Niki經理人。她透露Niki嚟緊主力國內發展，除咗佢仲有一位大陸經理人。

專黐叻女

Niki一向識揀朋友，10年前「大劉」劉鑾雄女友甘比仲係娛記嗰陣，Niki已經同佢好friend，家吓甘比飛上枝頭，Niki更經常約對方出街；加上親家姐周汶錡負責幫佢鋪路入豪門，仲有一班好姊妹，有傳阿Sa曾經替Niki引薦入英皇添！ ####

2/12傷心試婚紗

迫婚失敗嘅Niki，忍痛穿婚紗拍《女警愛作戰》，見佢個笑容咁勉強，真係有苦自己知。

冇咩心情嘅Niki，穿上婚紗都毫無光彩，工作人員幫佢整理裙腳，佢都木無表情。