cy blog: [FACE.直接睇]砌低法拉廁所宣言攞彩得戚胡囧：出年畀心機！

[FACE.直接睇]砌低法拉　廁所宣言攞彩　得戚胡囧：出年畀心機！

爭到底

今年無綫視帝視後之爭，結果由大熱鄭嘉穎同胡杏兒連掃兩大獎，胡杏兒終趕絕死敵法拉。

雖然網友唔多buy胡杏兒，不過新視後一於少理，攞足彩之餘，更於台上發表「廁所宣言」，公開同男友黄宗澤打情罵俏。

得戚杏兒成全場焦點，完騷後更明寸法拉：「冇獎出年再努力畀心機囉！」嘩，法拉聽到唔激到爆血管？

週一（5日）TVB台慶頒獎禮揭盅，賽前大熱的胡杏兒，竟先攞豬肉獎「我最喜愛的電視女角色」，以為要將視後寶座讓畀因左邊面癱要返加拿大休息半年的陳法拉，估佢唔到胡杏兒竟可再下一城，憑《萬凰之王》沅宛一角K.O.陳法拉嘅Madam Jo奪得視後，連攞兩獎high到震。

法拉速閃

胡杏兒成大贏家，輸得口服心唔服嘅法拉，於頒獎禮上強顏歡笑，完騷後更即時孖住同樣一個獎都冇嘅Laughing謝天華極速閃人。其實胡杏兒連攞兩獎，早得操生殺大權的回朝總經理陳志雲暗撐，陳總化名Eggzero在微博與胡杏兒互相關注，杏兒變「迷雲黨」新成員。坐定粒六的杏兒亦晨早度定「廁所宣言」：「佢（黄宗澤）同記者講，我攞獎時佢會去廁所，咁佢冇去廁所，我知道我有好多缺點，但你（黄宗澤）都好多缺點囉，都好難頂……一路頂住大家！」台上攞彩兼公開肉麻偉論，據知最初奪豬肉「我最喜愛的電視女角色」時的驚險情節，只為製造緊張氣氛。知情者說：「根本TVB一早預咗會頒視後畀杏兒，成班高層都晨早同佢派定定心丸，最慘係法拉一度以為自己有機會攞獎，傻吓傻吓做足成晚馬騮戲，畀着你都火啦！」賽後問到胡杏兒會否安慰零獎法拉時，胡杏兒說：「吓……呀呀……有獎攞梗係開心啦……我唔識答喎！」之後再潤多兩句：「好高興！我未諗去邊度慶祝，冇諗過之前攞到呢啲獎，如果真係攞唔到，再努力囉！出年畀心機！」嘩，風涼說話，特別夭心夭肺呀！

Laughing速閃避嘉穎

視帝獎項比視後競爭更激烈，賽前呼聲甚高嘅Laughing哥謝天華，竟然連豬肉獎都冇得分，完全敗畀《怒火街頭》「Law霸」鄭嘉穎。鄭嘉穎攞獎時更鄭重聲明：「我冇續約，證明個獎唔係換返嚟。」曲線讚自己夠實力，難怪Laughing嬲到即閃啦！

唐詩詠M胸最索

年年頒獎禮，姐仔例牌穀到盡鬥咪，冇獎攞起碼有張相見吓報，今年除咗法拉同杏兒係焦點，行紅地氈時奇峰凸出反而係唐詩詠，而著名形象指導Nel Nel（張學潤）亦說：「好有女人味！」可惜今年撞啱天降橫雨，搞到班姐仔甩曬轆，人算不如天算啦！

唐詩詠再發育

今年30歲嘅唐詩詠，啱啱同崔建邦復合果然特別精神，一件deep V穀到盡，平時又唔覺佢咁有料到喎。

樂瞳太重手

TVB姐仔出名易捱殘，25歲女樂瞳為遮掩黑眼圈，竟出現白色眼袋奇景，好在胸前夠索攞番分！

鍾嘉欣大富豪

鍾嘉欣樣靚，行紅地氈時一身閃金晚裝加艷紅唇膏，唔知點解睇落諗起尖東。

汪明荃金至尊

汪阿姐造型一向爆，今年更以一套全金鬥篷加熱褲，造型震撼之餘，鬥篷頂帽仲可以遮風擋雨，薑果然係老嘅辣。

楊怡落湯雞

女大十八變嘅楊怡今年擺明無望爭視後，行紅地氈時更加係收咪冇嘢睇，最黑仔係出場時撞啱最大雨，成身濕曬都仲要照顧鑽飾贊助商擺甫士任影，其實佢幾專業！

陳敏之出意外

奪得「最佳女配角」獎的陳敏之，一貫迷你裙show靚腳，但因裙尾太長，加上現場橫風橫雨，搞到她落開篷車時一時大意現打底褲，認真失手！

徐子珊攬到實

徐子珊出場時撞啱落雨，大會安排佢同緋聞男友黄宗澤一齊出場，黄宗澤除了擔遮護花外，隻手更攬到徐子珊纖腰實一實，因住胡杏兒睇見起火喎！ ####

即場連體

胡杏兒忍唔住喺台上向男友黃宗澤大講「廁所宣言」，耍花槍話Bosco好難頂，一落台卻攬實Bosco呵番，唔怪得攞到視後啦。

風騷

開騷前，滿懷自信的胡杏兒似勝券在握。